"နှင်း" မှ " မြူ" သို့
ဆောင်းနှောင်း နွေပြောင်း
ဟောဒီ
စပ်ကူး မတ်ကူးကာလလေးမှာတောင်
ကိုယ်ဟာ နလံမထူနိုင်သူ...
ဒေါမနဿတွေနဲ့
အသားသေနေတဲ့ စိတ်ဟာ
တရားနဲ့တောင် ဖြေမရ၊ ဖျောက်မရ....
ငါ့အိပ်မက်ကို
တံခါးလာလာ မခေါက်စမ်းပါနဲ့...
ဒီမှာ ကိုယ့်အတ္တနဲ့ကိုယ်
ခွေခေါက်နေရတာ
အသားသေနေပါပြီ...
မိုးလင်းပေါက်သောက်ခဲ့မိတဲ့
အိပ်မက်ခါးခါးတွေ...
အာခေါင်ခြစ်ထုတ်
ရင်နဲ့လုပ်ထားတဲ့ အလွမ်းဖွဲဖွဲတွေ...
ခြောက်ခြောက်ခြားခြား ပျောက်ပျောက်သွားတဲ့
အနာဂါတ်မျှစ်စို့တွေ...
ကိုယ် သွန်မှောက်လိုက်တဲ့ ဘ၀ကို
ဘယ်သူ ဆယ်ကောက်ယူမလဲ...
သံယောဇဉ်တရေးနိုးမှ
သူ့ ဓါတ်ပုံနွမ်းနွမ်းလေးကို
ခိုးခိုးနမ်းရတော့
တိုးလို့ လွမ်း တာ ပေါ့....
မနက်ကျမှ
ထ ထမက်တဲ့ အိပ်မက်တွေကို
စိတ်ပျက်လွန်းပါတယ်...
ကဲပါကွယ်...
ဒီလောက် အုတ်အော်သောင်းနင်း
ကိုယ့်တပ်ကိုယ် ပြန်နင်းနေမှတော့
ပွဲလန့်တုန်း မင်းမာယာလေး လာမခင်းခင်
ကိုယ့်နှလုံးသားကို
မင်းဘ၀ထဲ ပစ်ချလိုက်မယ်...
ကဲ!
အလွမ်းများ ငြိမ်းစေသတည်း.....။ ။
(လင်းသက်)
No comments:
Post a Comment