အိပ်မက်တွေက
တစ်နေ့လုံးခြောက်လှန့်လာတော့
စိတ်ကို အဆာသွပ်ဖို့မလွယ်ဘူး….
တဒိတ်ဒိတ်ခုန်နေတဲ့ အာရုံမှာ
ကျွန်တော့ကိုယ် ကျွန်တော်
မှုန်ပျပျမြင်နေရတယ်….
နှင်းမှမရှိတော့ပဲ
ဘာကြောင့် ကိုယ်က
စိမ်းလန်းနေရဦးမှာလဲ
အဲဒီရာသီပေါ် အလွမ်းတွေကို
မုန်းတယ်….
ကြည့်နေရင်း
ဖျတ်ခနဲ ပွင့်သွားတဲ့အလင်းဟာ
ဒုက္ခချည်းပဲလို့ သိလိုက်ရတော့
ကျွန်တော်က
သံယောဇဉ်တွေကို လှဲသိပ်ပစ်ဖို့ကြိုးစားတယ်…..
နောက်ဆုံးကျည်ဆန်ဆိုတာ
မနက်ဖြန်တွေကို
အသက်ဆက်မယ့်ဆေး…
ကိုယ်ကတော့
ဘယ်သူပေးပေး
ယူရလိမ့်မယ်….
နှုတ်ဆက်လိုက်ပါတယ်….
အစကတည်းက
နွေးနွေးထွေးထွေးမကြိုဆိုမိတာမို့
အေးတိအေးစက်
နှုတ်ဆက်လိုက်ပါတယ်….
ကျွန်တော်က
ကိုယ့်သောကနဲ့ကိုယ်
အနည်ထိုင်ရတာကိုမှ
မိုက်မိုက်မဲမဲ နှစ်ခြိုက်တတ်တဲ့ကောင်ပါ…
စမျဉ်းနဲ့ ဆုံမှတ်အကြား
ချိန်သားကိုက် တာမထွက်နိုင်မှတော့
ရိုးရိုးသားသား လွဲလိုက်ကြရုံပေါ့….
လမ်းခွဲကြပါစို့ကွယ်....
စိတ်ဓါတ်တွေ နောက်ပြန် မညွတ်ခင်
အံကြိတ်ဆင်ခြင်ရတော့မှာပေါ့…
ကျွံသွားတဲ့ဆန္ဒတွေကို
ရိတ်သိမ်းထားတယ်ဆိုပေမယ့်
သဲသဲကွဲကွဲမရှိတဲ့
အနာဂါတ်အတွက်
ကြေကွဲတယ်ဆိုရုံလေး
ဘယ်အလွမ်းနဲ့မဆို
သဟဇာတဖြစ်ချင်ပါသေးတယ်….။ ။
လင်းသက်
(၄.၁၀.၂၀၁၂)
No comments:
Post a Comment