" ရှေးရှေးတုန်းက " နဲ့စတဲ့
ပုံပြင်တွေကို
ရှေးမူမပျက် ခေါက်သိမ်းထားလိုက်ရင်
ငါ့ အနုပညာဟာ
တန်ဘိုး ပိုတက်လာဦးမှာလား....
အရှုံးတွေ ၀က်ဝက်ကွဲတဲ့ ဒီဘ၀မှာ
နောက်ထပ်
ဘယ်လို အခါးဓါတ်မျိုးမှ စိမ့်ထွက်စရာမရှိ....
သူတို့ပြောတဲ့ သီလတွေကြားထဲ
ငါလည်း မြက်မစားနိုင်မှတော့
ဂူပိတ် တရားကျင့်နေရုံပဲပေါ့...
တွန့်ဆုတ်တွေဝေဖို့
ဘယ်ကိစ္စမှ
ငါ့မနက်ဖြန်ဆီ
ခြေလှမ်းမပြင်ကြနဲ့....
အဲဒီလို သတ္တိတွေ
ဘ၀လုံးပေါက်အောင် ကိုင်းညွတ်ဖို့
ငါ့ပါရမီတွေ
တစ်တောလုံး ဝေ ခဲ့ရတာပေါ့....
ချွတ်ချုံကျ မာန ကို
အ၀ီစိထိ
ထုတ်ချင်းခတ်လိုက်တော့
သူတို့ တုံ့ပြန်မှုမှာ
ငါ နားမလည်နိုင်တဲ့
ထပ်ညွှန်း ထပ်ကိန်း သီအိုရီတွေနဲ့....
စိတ်ကူးတွေမှုတ်, မှုတ်ထုတ်တဲ့
အိပ်မက်တွေက
လက်တွေ့မှာ
အစီးအနင်း များလွန်းလို့
ငါ့ ကိုယ်ရေးကိုယ်တာ မာတိကာမှာ
ပြဿဒါး စာမျက်နှာကို
ရိုးရာ သင်္ကေတတွေနဲ့
နမိတ်ပြပေးစမ်းပါ့.....
နောက်တော့လည်း
ငါ့ ဇာတာခွင်မှာ
နေမ၀င်မီ မိုးအရင်ချုပ်တတ်တဲ့
ဓလေ့ထုံးစံတွေက
ကံကျိုး ကံပျက်တွေနဲ့
သံယောဇာဉ် မကင်းခဲ့ပြန်ဘူး....
အဲဒီလို သွေးရိုးသားရိုးလွဲနေတဲ့
မိန် ရာသီဖွါး ငါ့ကို
ဘယ်နက္ခတ်မျိုးနဲ့မှ
စန်းယှဉ် တည့်မတ်လို့ မရ....
ရှိသမျှရနံ့တွေနဲ့
မီးကုန်ယမ်းကုန် ပွင့်
ပြီးတော့မှ
နတ်ဝှက်ခံလိုက်ရသလိုမျိုး.....
သူတို့ကျားကွက်မှာ
ကင်းမပေါက်ခင်
ငါ့ဝီရိယတွေ
တပ်ဦးကျွံနေတာမျိုး....
အဆင်မပြေမှု့ထောင့်ချိုးမှာ
ငါချွေးစို့ခဲ့တဲ့
ငွေစ ကြေးစ ကြား
ဓါးသွားတွေ သွန်းဆစ်ထားတာမျိုး....
မီးစာမကုန်မီ
ဆီအရင်ခန်းတာမျိုး....
မြှားမရောက်ခင်
စစ်ကုန်သွားတာမျိုး....
ဘယ်လိုပျံသန်းမှုမျိုးပဲဖြစ်ဖြစ်
ငါ့တောင်ပံမှာ
လေးညှို့ငင်သံတွေနဲ့....
ထိုအဆီအငေါ်မတည့်မှုများအား
နံပါတ်စဉ်တပ်အပြီးတွင်
ခင်းကျင်းပြသ လိုက်သည့်
" ကျွန်တော်က ဘ၀ကို မစီးမီ
ဘ၀က ကျွန်တော့ကို
မြင်းလို စီးသွားသော "
ရိုးရာ ပြက်...လုံး....များ။ ။
(လင်းသက်)
No comments:
Post a Comment